|
يالعربى يا ولد النّخلة فـــــيــــــــق وين ماشي بالغفلة
هز راسك في السماء شوف القمة و منين يجي الماء
تاريخك نسيتو غرقت في العفنة، كرامتك ويني تتقاس بالحفنة
إسمعني نقلّك كلام ما يفرح مذبّب مشوّك و يجرح
كلامي يمكن ما يسرّش لكنو ينفع ما يضرّش
.. قُــــلّــــي
شكون جاب العلم والثقافة شكون قرّا العالم العفافة
شكون دهن الدنيا بالحنّة شكون ورّا الناس طريق الجنة
شكون زرع الورد و الياسمين شكون تسمى الصادق الأمين
شكون حط أول أحجار الحرية شكون عطا لابن آدم شخصية
شكون كان يفهم الكلمة و المعنى شكون كان يقيس و يشلق بالطعنة
.. قُــــلّــــي
شكون عطا للمرا قيمتها و شكون اليوم هبّطها من قمّتها
شكون علّم الشّعوب النظافة و شكون اليوم ربّ القــفّـافة
شكون كان يخلق في الحكمة وشكون اليوم زايلة بكمة
شكون كان يبرطع من قمة لقمة وشكون اليوم ضاعت عليه الهمّة
شكون كان ما يخبي شي على جارو وشكون اليوم عاطي للذلّ كارو
يالعربى يا ولد النّخلة فـــــيــــــــق وين ماشي بالغفلة
هز راسك في السماء شوف القمة و منين يجي الماء
تاريخك نسيتو غرقت في العفنة، كرامتك ويني تتقاس بالحفنة
.. قُــــلّــــي
شكون اليوم يديه حرش كذاب سرّاق و ديما يغشّ
شكون اليوم بكلو هموم محقور في العالم مذموم
شكون تشوفو تعرف مقرو من غير ما ينطق يبوح بسرو
شكون يشرب في الماء ممسّخ شكون ياكل في الشوك مفسّخ
شكون حياتو بكلها مرار من تاريخو ما قعدلو كان الآثار
شكون فمّو مقفول بالشرليّة عمرو ما ذاق نهار الحريّة
شكون يمشي عينيه على أكتافو خايف من ظلّو على أقفافو
شكون راسو هابط في الوطا يتحرك يتلفت ياكل العصا
شكون يصدر في الياقوت قفاف و يجيب في الزبلة أصناف أصناف
شكون يبيع في ضناه مرصّف عرضو مهتوك ما هوش متأسّف
شكون المنبوز ديما متنرفز ديما يقحر شكلو متكرفس
.. إسمعني !
إتزحزح إتحرك أخرج من غارك، الفار من بكري يلعب في دارك
الباب اللّي يجيك منو الريح كي تسدو عمرك ما تستريح
بابك يبقى مسدود قدامك و أنت تبقى تستنى في إعدامك
حل الباب خلي بيتك يتنفس خلي صغارك تردس و ترفس
إتعلم تقاوم الموجة بخفافة و كيفاش تولي الحيوط شفافة
حياتك واش تعمل بيها إذا أنت déjà مدفون فيها
متكي راقد تستحلى في النومة شوف جيرانك تكلط في الحومة
شوف وإسمع وإفهم و اتكلم أقرا المعاني حاول تتعلم
تتعلم يمكن تتعب و تتألم إنسى و كمل عمرك ما تسلم
إجبد ساقيك ملوحل تلقى لكل مشكل حلّ
يالعربى يا ولد النخلة فيق وين ماشي بالغفلة
هز راسك في السماء شوف القمّة ومنين يجي الماء | 
Contribuer