قالك منصف بن علي خو الزين شافوه يحوّس في جربة عامل عملية تجميل في خليقتو وكيف فطن بيه واحد من صحابو بالصوت متاعو قلب وذاب كيف الملحة.
يا صاحبي الحكاية فيها إن وأنا نقول شبيها الزطلة كثرت أكثر ملي مات المنصف وهنا بيت السر. توة هذا معقول يسيبو الزطلة تعوم في البلاد والشباب مل مالبطالة والقهر، ما قدامو كان الزطلة باش ينسي روحو وينسى اللي كان سبب في تكسير طموحو ويكملوا على مرمتو و كيف العادة يهزوه للتحليل و عويم ضيافة في دار الزين والطحانة متع بن علي فرقة 17 وفرقة 15 و 14 يفكوا الزطلة و يعاودوا يسيبوها للصبابا باش يسوقوها مرة أخرى منداف للضبوعة كيما يقولو هوما.
وقداش تكثر الظاهرة هاذي وقت الانتخابات أكثرية الشباب يحضروا الزّور متع الحبس قبل ما تجي الإنتخابات ولاو حافظين دروسهم ولسان حال الجنرال حط الكلاب في الحبس بأي طريقة لا يفرفشوهالي.
واللي زادت قالتلهم بف في الحبس القارديانات والضباط يدخلوا فيها كيف الدخان وكيما يقولوا جماعة الحبس : « وينو الصابون يا قرديان ؟ » والزطلة في الحبس أكثر ملّي في الشارع !

عندي ولد صاحبي شدّوه بالصدفة قاعد مع أصحابو يتكيفوا، وهو عمرو ما حطّو في فمّو، وراكم تعرفوا اللي يستنشق أكثر ملّي يتكيف و الولد طالب في الجامعة رصاتلو عويم في دار الزين وشاف العجب المسكين و ما فهم الحقيقة كان في الحبس وفهم الترافيك متع الزطلة و شكون وراها المهم الولد يكتب في مذكّرة طويلة وعريضة فيها بالإسم واللقب شكون وراء الترافيك متع الزّطلة في الحبس والبرّه و وعدني بوه باش يعمل كل شيء ويقول كل شيء باش يفضح الزابا الزابا اللّي يبيع القرد و يضحك على أمّاليه.
المهم المنصف بن علي ديما خدام ميّت ولا حي، وقيس ولدو شادد كل شيء يبيع بالجملة والتفصيل والبرط متع رادس كلّو في يدّو ويقول لجماعة البزنس ما إتّعبوش رواحكم في الدّيوانة والبيرو متع قيس يسد 10.000 دينار على الحاوية و يخرّجها دوفيس "devises"، زطلة، غبرة، فياقرا "Viagra"، ديديتي "D.D.T." على بعضو...
لكن اللّي يزيد يقهرني أكثر العالم قلبتوه على 600 مسجون سياسي وآلاف من الشباب في الحبس ظلم و بهتان على خاطر الزطلة والقروسيست بالقارتكور متع سلامة أمن الدولة و لا حدّ يحكي عليهم، شادّين البلاد و العباد ومدرسة الفساد والعياقة ولي قرون ميزون"Les grandes maisons".
المهم وينكم يا شجعان ويا اللّي تفهمو في البوليتيك وتدافعو على الحرية ؟!