|
Vous êtes ici :
Sommaire
>
TUNeZINE 132
> اللّي يخونها ذراعها تقول سحروني
| E-mag |
| Rubriques |
 Contribuer
A vos e-plumes ! Le Forum - المنتدى
Là où l’on cause Les Clefs
Pour comprendre le site Chantier Démocratique
Pour la Liberté en Tunisie Internautes de Zarzis
La jeunesse souffre-douleur de Ben Ali La Galerie
A voir et à entendre Débat national
القسم العربي
Des Liens
Pour découvrir Prisonniers d’opinion
Prisonniers de l’Injustice Freezone
Zone l.i.b.r.e Un peu d’Actu
Ça se passe au bled International
Ça se passe ailleurs |
| اللّي يخونها ذراعها تقول سحروني
|
 السلام عليكم فردا فردا وكلاشا كلاشا و سكودا سكودا،يا جماعة كيما قلتلكم راني بالقاوري ضعيف، اما نطش طشان وكيف ما نفهم حاجة نجيب ولد اختي يقرى في الثالثة ابتدائي يترجملي، المهم هاني نعمل كيف مماتي الله يرحمها في كل محضر نحضر. اما الحاجة الي ما تدخلشي المخي علاش ديما الخاسر يرمي الكورة للي اخسر منو القوشي يقول الخوانجية هم سبب الهم والغم ولخوانجي يقول العلماني والقوشي و و و و و و ... و هم سبب المصايب و الحقيقة الكلهم كعبة لا في الحديقة. الحقيقة العقلية متع العربي هي المشكلة نحن العرب ما زال العقلية متاعنا فيها التبعية و التقليد والعاطفة واللي يخونها ذراعها تقول سحروني كل واحد دولة بذاتو وكل واحد يقول عندي ما عند حد وكل واحد يجري على مصلحتو. المصيبة اللي يحب يوصل للسلطة يعمل كل شئ و يقول كل شئ و ما يعجبو حتى شيئ واللي يشد رئيس حزب وإلا رئيس حركة يقعد مدى الحيات ويلوم على الحكام شبيهم ما ينحيهم كان الموت، و اللي يكون داخل الحزب ولا جماعة ولا حركة يبده كيف البابغيو يكرر الي يقولو رئيسو. برجولية يلزم الناس الكل تتحرر من التبعية و الترهدين والتكنبين والقوادة وقول الحق وخلي راسك يتشق. يلزمها ثورة جديدة وعقلية جديدة وحرية جديدة. الله يرحمك يا مماتي كان جيتي حية راك ولّيتي رئيسة جمهورية تفهم في كل شيئ وتعمل كل شيئ و ما تخاف من حتى شئ، اما بالنسبة للمعارضة الي تموت على التمثيل و الترهدين ولي بتضاهر بحب الدين وكلهم بعيدين على الشعب بعد التكساس على الملاسين. يا خويا اللي يحب يتحدى يعمل كيف مماتي الله يرحمها ولا يسيب عليه راهو ينفخ في امبوله مفلوقة. يلزم يهبطو للزناقي ولنهجة و الشوارع و يعملو كيما كانت تعمل مماتي لا تفوتها زهومة و لا عزومة في لفراح تزغرط وفي الموت تنوح وفي الولادة تنفس لايسلك منها لا العطار و لا الخضار و لا الخياط و لا الجزار، في كل محفل تحضر يعرفها الضالم و المضلوم والغني و لفقير الناس الكل عندها كيف كيف كيف الشتاء و كيف الصيف انا نقولكم مماتي اشهر من السماتي والمرزوقي وحمه الهمامي والغنوشي والمعارضة الكرتونية على بعضها. والي ما عندو شاهد كذاب اسئل اي مدينة على مماتي يحكولك اعليها. هاي الحاجة جات، هاي الحاجة مشات، هاي الحاجة حنت، هاي الحاجة غسلت الميت ولا الحي كيف كيف، هاي الحاجة رهنت السفساري متاعها باش تعمل محامي لولد حومتها، و هاي وهاي و هاي وهاي... يا سامعين وقاريين انا نقولكم و خوذها مني بالمتعني اللي ما يعمل كيف مماتي و يشمر على ذراعو ويعرفو لكبير و صغير والفقير و الغني و يهبط للحومه العربي والاحياء الشعبية ويتربع مع الناس وياكل معاهم الكسكسي و العجة و الزيت و الزيتون ويحللهم مشاكلهم ما يربح لا بن علي و لا بن مبارك و لا بن قذافي و لابن بن بن بن بن بن... |
| الشنفرة شاد سيفو 12-12-2004 |
| الشنفرة شاد سيفو |
| - عم جلّول بي بي سي |
| - شبيها الزّطلة كثرت أكثر ؟ |
| - إذا الشعب يوما أراد الكوراج |
| - كف وبعد 15 عام كعبة حلوى |
| - اللّي يخونها ذراعها تقول سحروني |