"يا وليد يا وخي، راني مشيت باش نطوّل عمري، حبّيت ندز فازتي. مشيت بحذا بوش باش نولّيو أنا ويّاه أبطال العالم، ياخي يا وليد وخي راهو حقرني و مزبلني ... قدّام النّس الكل!!! هكّه، طول قدّام الكاميرا!! آه! يا وليد وخي، ما عادش نعرف آش نعمل، زيد راني مشيت للهذاكا آش يقولولو اسبيطار متاعهم، تي هذاكا اللّي ايسمّّيوه Memorial Hospital ولّا شنوّه، مشيت باش نداوي عالسّرطان ياخي يسخايلوني فقدت الذّاكره!. ملّا بهايم يا وخي هالأمريكان. تي الحاصيلو، آش علينا، المفيد، موش لازم نحكيلك أما راهو قالولي اللّي مزمّره عليّ ... آه يا وليد وخي، راني دخلت بعضي... ياخي برّه هكّاكه وانا راجع لتونس نخمّ م بيني و بين روحي، نقول توّه أنا كيف مكمّل، خلّي الواحد يتوب و يشوف كيفاش يلقى حلّ لروحو، جيت نحسب فيها (أما entre parenthèses ، بيناتنا، موش على خاطر قالولك اللّي أنا bac -3 معناتها راهو اللّي ما نعرفش نحسب، رد بالك) الحاصيلو، المفيد، عاد قلتلك جيت نحسب فيها، نلقا اللّي هالبلاد اللذي شربكتها ما عاد فيها ما يتصلّح! يا وخي منين باش نشدّها؟ دخلت بعضاها bien ، والخامج أخمج مالآخر، أيّا برّا قلت نمشي ندخل الهاكلّي آش يقولولها opposition ولّا آش يقولولها، ياخي يا وليد وخي، ياااا وليد وخي، أوووه أوووه، أنا جيت نشوف فيها و نلقاها ... أف! تي خلّيني ساكت و برّه! قلت خلّي نقعد في بلاصتي خير، ما عادش نعرف فين نقبّل. أما تعرف، ظاهر لي الجماعة كيف يستخايلو اللّي أمريكا تحب تلعبلي اللّعبة، ولّاو يدّازّو يحبّو باش شكون يشد بلاصة ... hé hé أما هوما يظهرللهم واكاهو، ها تو تشوفو شكون باش يلعب اللّعبة للآخر، جايين مع نحن زعبع و ما قالت النّاس! أما اسمع، بيناتنا باش نقلّك فازة و ما تشلّقش، باش نمشي نعمل maîtrise في gestion ، تي معناتها ندبّر موش نعمل، تو نكلّم هاذاكا المدير آش اسمو هو، تي هاذاكا، الحاصيلو، ندبّر كعبة maîtrise ، و من بعد نمشي نعمللها كعبة DESS مثلا برّة نقولو في ال finance ، و زيد برّة نقولو نمشي نعملها في فرانسا، يا أخي أنا قلقت شويّة من هالبلاد، خلّي نمشي نبدّل شويّة الجو، نكلّم هاذاكا المدير متاع الشّؤون الطّالبيّة و نقلّو يمشّيلي كعبة bourse ، و نمشي بحذا Jacques ، آآآه، صحوبة هاذاكة Jacques، نبردلوها غادي مع بعضنا، و نقلّو يسلّكهالي في وحيّد DESS في ال finance، و من بعد نرجع نعمل OPA ، آش قولك؟"