أحسن نوارة تقطفها كلمة على الغرّة تخطفها
المرحوم صالح الخميسي

ـ اشكونو هو عبد الله الزواري ؟ ياخي بوك و إلا خوك؟ أخطاك من البوليتيك، يا ناجي براس أمك اعطيه كعبة أخرى سلتيا على حسابي، و إقلب علينا ها الصحن.

ـ تو الحسبة محسوبة، الزين من هنا حتى للعام ألفين واربعطاش، من بعدو تشد ليلى الكرسى حتي بكبر الفرخ ولد الحرام و يشد بقعة أمّو.

ـ قالك البيرة الجديدة هاذيكا تورد فيها نعيمة أخت الزين
ـ لا غالط الي قالك، البيرة متاع البرة الدّومان متاع قيس بن علي.

ـ سمعت الزطلة كثرت في البلاد على خاطر الموساد عندو خطة لتخدير العرب.
ـ مالا قلي الزين والطرابلسية الكل يخدموا مع الموساد؟!

ـ ما عاد تفهم شيء في البلاد هاذي، كان صليت و مشيت للجامع مشكلة و يدوّروهالك خوانجي، و كان سكرت يدوّروهالك قضيّة في السكر الواضح و التشويش بالطريق العام و التجاهر بما ينافي الحياء!